الدفاع عن اللغة العربية، وخاصة عند الناس اللي كيربطوها بالدين، يقدر يوصل بمولاه بعيد، وهادي هي حالة الحاج الطنجاوي اللي تعصب على نور الدين عيوش بطريقة ما مقبولاش. كيفاش؟
تصريحات رجل الأعمال نور الدين عيوش، والملقب ب”عراب الدارجة”، حول اللغة العربية، وقوله إن القرآن لم ينزل بها، خلات واحد الحاج طنجاوي يدير فيديو وهو هاز مصحف في يديه ويطلب من رئيس الحكومة ووزير العدل ووزير التعليم ووزير الأوقاف وأئمة المساجد التدخل، لأنه، حسب تعبيره، نور الدين عيوش “يهاجم الإسلام”.
وما توقفاتش القضية عند هاد الحد، فالحاج طنجاوي هدد عيوش بالقتل، وقاليه لو كنتي في طنجة “نهز سيف ونقطع ليك راسك ونمشي نسلم نفسي وأنا مرتاح”، وهاد الشي بطبيعة الحال من بعد ما تفنن في سب عضو المجلس الأعلى للتربية والتكوين والبحث العلمي ونعته بأبشع الصفات.
الهضرة ديال الحاج الطنجاوي خلات مجموعة ديال الشباب اللي على سبة يخرجوا من العباءة ديال السلم والسلام ويبداو كيقولو في التعاليق باللي الحاج عندو الحق وعيوش ختصو يطبق عليه حد القتل. بحال الخرجات ديال الحاج وغيرو هي اللي كتساهم في انتشار الأفكار الداعشية والعنف بين الناس.
والأخطر من ذل أنه انتقد الأمن والمسؤولين على أساس أنهم ما دايرينش خدمتهم فيما يخص نور الدين عيوش.
