الرقاة الشرعيين فالمغرب ما بقاش قادهم يحلو محل فحي شعبي ويستقبلو الناس فيه مقابل ثمن رمزي، ولكن طلعو النيفو ورجعو كيسمسرو فالفايس بوك، وكيديرو لايفات وإعلانات للزيارات ديالهم فالمدن، باش يديرو الرقية الجماعية للناس ويزيدو يكبرو الدائرة ديال الكليان ديالهم.
لايفات كثيرة وفيديوهات يومية مع عناوين مثيرة وتقريبا كلها كتشابه، بحال “شاهد الراقي فلان يخرج ملك الجن” و”شاهد الراقي علان يحارب ملك الجن” و”ملك الجن يسلم بعد حصة رقية”، وبزاف ديال القصص اللي ما كيقبلهاش العقل، وواخا هاكاك عدد كبير من الناس تتفاعل مع هاد الفيديوهات، وكتسول على الراقي مول الفيديو باش تمشي “تتعالج” عندو.
وفواحد المشهد غريب وتحدي لجميع القوانين الفيزيائية اللي العلم وضحها قبل قرون، ثلاثة رقاة في نفس الوقت دايرين لايف كاتبين عليه باللي كيحاربو ملك الجن “شمهروش”، واش دابا شمهروش كيقدر يكون في أمكنة مختلفة فنفس الوقت؟ ولا كاينين بزاف ديال “شمهروشات” فالمغرب؟
هاد الرقاة لقاو فمواقع التواصل الاجتماعي، وخاصة الفايس بوك، أرضية خصبة للدجل ديالهم، حيث فيه “حط الفلوس وتشهر”، كيحطو فيديو ويديرو ليه سبونسورينغ ويديرو قصص غريبة مع عناوين مثيرة، وهاد التفاعل موجود وهاد الناس جاية تتعاجل، وبالثمن اللي بغاو، وزادوها بالسفر للمدن اللي فيها الطلب بزاف وما كيمشو يقضو فيها الغرض.
عدد من هاد الرقاة داير أدمين خاص بالصفحة كيسيرها ليه ويحط ليه الفيديوهات والعناوين، زائد داير شخص خاص بالرد على التلفون، وكذلك شخص خاص بالاستقبال، يعني مشروع قائم بذاتو، وكيدخل لمولاه أرباح كبيرة، منين قدر يخدم هاد الناس كاملين.
وكيروج باللي ثمن الرقية فبحال هاد الحالات كتصول حتى ل300 درهم للحصة، وفي أقل من ساعة، وباللي الواحد يلا قبل يدير الفيديو فالفايس بوك، كينقص ليه الراقي من الثمن ديال الحصة، وعدد من الناس كيشدو مواعيد لأيام حيث كيكون المركز عامر بزاف.
