مالني مزغب… مالني ما مزغبش!!

خوتي المغاربة ها واحد السلام عليكم. سمحو لي راه كنتعطل عليكم، حيت هاد الأيام راني مشغول شوية. أكيد شفتوني مشيت عند البابا فالفاتيكان، وشفتوه كيفاش عجبو الحال وهو كيهضر معايا. عمركم شفتو البابا كيضحك؟ إيوا ها هو دارها، ومن بعد هاد المجهود كامل غادي يجيو دوك المعارضين، ديالي الله يهديهم، ويقولو الحكومة ما خداماش. إيوا اللي فيكم واعر يضحك البابا، الحمد لله، هذا إنجاز تاريخي، غادي تقراه الأجيال اللي جاية، أما هادو ديال دابا ما يقدّروش الخدمة اللي كندير.
كاين فيكم اللي غادي يقول مالك يا السي بنكيران على ديك اللحية اللي بقيتي كترازي فيها حتى وليتي بحال المغنيين ديال روتانا. وكاين اللي غادي يقول لي آش دوك النظاظر الجداد. إيوا قولو لي غير بالصحة بعدا، وأنا غادي نشرح ليكم.
بالنسبة للحية، القضية وما فيها، يا خوتي المغاربة، وسمعوني مزيان، وخليو عليكم الهضرة ديال المشوشين، هي أنني بديت كنرطاب، ما بقيتش باغي نبقى مزغب بحال بكري. إيوا، كيف كتعرفو، المغاربة اختاروني، وأنا خاصني نكون فالمستوى، وديك اللحية اللي كنت داير ما جاياش مع البوسط اللي عندي دابا.
أما القضية ديال النظاظر، يا خوتي المغاربة، فحتى هي بحال قضية اللحية. واش بنكيران ديال دابا هو بنكيران ديال بكري؟ ما يمكنش. راه الراس اللي ما يدور كدية. داك الشي الي كنت كنشوف بكري ماشي هو اللي كنشوف دابا. راه لكل مقام مقال… ونظاظر.
فهمتوني ولالا؟