مزال صحاب اللايك والبارطاجي غاديين بنفس الطريقة، وخاص غير تبان شي خبار فالفايس بوك، اللي غادي دير البوز، كيحطوها بلا ما يديرو ولو بحث بسيط باش يتحققو.
اليوم الأربعاء (9 يوليوز)، واحد البنت صغيرة ماتت فليبيا، بسبب لدغة عقرب، والمواقع الليبية نقلت الخبر بالصور، اللي انتشرو من بعد على مواقع التواصل الاجتماعي.
ومن بعد ساعات، صحفات مغربية على الفايس بوك نشرات هاد الصور، وقالت باللي هاد الشي وقع فالمغرب وزادو على القصة تفاصيل أخرى ما عندها حتى أساس.
وحسب قناة “ليبيا” الليبية، فالبنت سميتها لجين عبد المجيد السرار، ماتت فالفجر ديال اليوم، ورواد مواقع التواصل الاجتماعي فليبيا تتضامنو مع الأب، حيث قبل شي شهور، كانت مراتو ماتت هي وولدو من بعد ما طاح عليهم الحيط ديال الدار.
