وزراء فإيطاليا قهراتهم المنافسة المغربية، وحتى ديال دول عربية أخرى بحال تونس، حتى أن نائب رئيس الوزراء لويجي دي مايو، ووزير العمل والتنمية الإقتصادية في الحكومة الإيطالية، طالب أخيرا بمراجعة الاتفاقيات مع المغرب، لحماية المنتوجات الفلاحية المحلية الإيطالية، على حد قوله.
وفي تصريحات نقلتها قنوات تلفزية إيطالية، هاد الوزير، اللي هو كذلك زعيم حركة الخمس نجوم اللي جابوا المرتبة الأولى في آخر انتخابات تشريعية، قال باللي “خاص الإيطاليين يغيرو سياسة الاستيراد ديالهم، وهاد الشي كنا كنقولوه ملي كنا فالمعارضة، ودابا غادي نبداو التفاوض باش نبدلو هاد الاتفاقيات”.
ماشي غير هاد الوزير اللي خرج بتصريحات نارية، حتى ماتيو سالڤيني، وزير الداخلية الحالي ورئيس حزب الرابطة، تعرف بالهجوم ديالو على الكليمانتين المغربي وباقي الحوامض اللي كتوصل لبلادو، واللي، بسبب “المنافسة غير المتكافئة”، وصل بيه الحد أنه يقول عليها “قاذورات”.