محمد المبارك
عادة الأب اللي كيكمي كيحاول ما يكميش قدام الأبناء ديالو باش ما يتعلموش منو هاد العادة السيئة والمضرة حتى بالصحة ديالهم، وبالأخص يلا كانو باقين صغار، ولكن واحد السيد كيبان ففيديو هرس كاع هاد الأعراف، وبغا يرجع طفلة صغيرة مدمنة من صغرها. كيفاش؟
البارح الأربعاء (10 أكتوبر)، انتشر فيديو على مواقع التواصل الاجتماعي كيبان فيه رجل، كبير في العمر، كيعطي لبنت صغيرة “الكيف” تكميه، والغريب أن الفيديو حاضرين فيه نساء من العائلة وكيضحكو بهاد الشي، وكيصورو المشهد وهوما فرحانين.
البنت الصغيرة، ومن بعد محاولات، نجحات تكمي الكيف، وهوما كيشجعو فيها، وبقات كتكحب لمدة طويلة حتى تخلعو الناس اللي معاها وحبسو الفيديو.
هاد الشي ما عجبش العديد من رواد مواقع التواصل الاجتماعي واللي طالبوا بالمحاسبة ديال الرجل وتدخل الجمعيات المعنية بحماية حقوق الطفل.
وعلق أحدهم: “وغدا يقوليك الدولة خرجات لينا على ولادنا”.
