بحال بزاف ديال الناس اللي كيتشهرو على مواقع التواصل الاجتماعي، فاطمة الزهراء المعروفة ب”الفتاة التي تعيش بنصف جسد” دازت الأيام ديالها فالبوز وتنسات.
هادي شهرين، عدد كبير من رواد مواقع التواصل الاجتماعي كانوا كينشرو التصاور ديال فاطمة الزهراء فاش يالاه بانت، والناس كيطالبو يتدخلو المحسنين باش يعاونوها ويشرو ليها كرسي ويساعدوها ماديا، وهاد الشي اللي كان بالضبط.
فاطمة الزهراء قالت لموقع “كيفاش”، باللي جاو عندها فنانين تصورو معاها فالدار، ومن بعد دارت ليها سيدة من طنجة حفلة وسط أوطيل معروف، وواحد من المحسنين اللي رفض يبان فالصورة وما بغاش يقول ليها سميتو هو اللي جاب ليها الكرسي ديال الضو.
وفالتصريح ديالها كتقول فاطمة الزهراء: “أنا فرحت بزاف بالحفلة اللي دارت ليا السيدة، وحتى الناس اللي جاو عندي سوا فنانين ولا أي واحد، فرحت بيهم، غير كتبقى مسألة أنني محتاجة شي حاجة اللي يكون عندي منها مدخول يومي… أنا ما كرهتش الفنانين يديرو مبادرة بيناتهم، ويديرو ليا مشروع اللي نعيش منو ويبقى للدوام، ويكون عندي مدخول ونعاون حتى أنا الناس”.