كشف الإعلامي الرياضي أسامة بن عبد الله، عن الصعوبات التي واجهتها الجامعة الملكية المغربية لكرة القدم في شخص رئيسها فوزي لقجع، من أجل توفير تذاكر مجانية للجماهير المغربية للدخول إلى الملعب لمساندة الأسود.
وقال بن عبد الله في بث مباشر مع الإعلامي رضوان الرمضاني إن “الجامعة شرات ليبيي وخلصاتهم بفلوسها وعطاتهم للجمهور المغربي فابور باش يدخلو يتفرجو فالماتش اللي فات أمام الصبليون”.
وأضاف “هاد القضية را ممنوعة فقانون الفيفا ولكن الجامعة دارتها باش الجمهور المغربي يدخل يشجع،
حيت يومين قبل المباراة كانت حالة هستيرية فالدوحة الجمهور ما لاقيش التيكي وكيقولو را شراوهم البنغلاديش را شراوهم الهنود باش يعاودو فيهم البيع، هادو شراوهم حيت حنا ما كناش تايقين فالمنتخب ديالنا وما خذيناهمش”.
وتابع بن عبد الله” التدخل ديال الجامعة ما كانش ساهل وفوزي لقجع را وصل للصداع مع إنفانتينو باش ياخذ هادوك التذاكر حيت القانون كيمنع ذلك”، موضحا “فاللول حطو 5000 تذكرة إضافية فموقع الفيفا وتباعت كاملة خلال 12 دقيقة وفالتالي كانو ملزمين باش يفرقو تذاكر ورقية على الناس اللي ما كانش عندهم التذاكر”.
وواصل” علما أن بزاف دالناس اللي عندهم إمكانيات وما كاين مشكل فالفلوس خلصو تذكرة بـ1500 دولار (15 ألف درهم مغربية)، حيت مّسك عليهم الله هاد الثمن كيخلصوه فكل كلاسيكو يعني ما كاين مشكل تخلص هاد الثمن على منتخب بلادك”.
ومن المقرر أن توزع الجامعة الملكية المغربية لكرة القدم، من جديد، عدد محدد من التذاكر على الجماهير المغربية مجانا، لحضور مباراة المنتخب الوطني أمام نظيره البرتغالي، لحساب دور ربع نهائي كأس العالم 2022 في قطر.
وستجرى مباراة المنتخب الوطني المغربي ونظيره البرتغالي على أرضية ملعب الثمامة، عصر اليوم السبت (10 دجنبر) ، في الرابعة بالتوقيت المغربي.