كشف الإطار الوطني عادل رمزي، المدرب السابق لفريق الوداد الرياضي، عن سبب عدم سفره مع المنتخب الوطني المغربي إلى قطر، إلى جانب الطاقم التقني، خلال منافسات كأس العالم قطر 2022.
وخلال استضافته في برنامج “بدون لغة خشب”، الذي يذاع عبر أثير إذاعة “ميد راديو”، “أنا بلادي هي اللولة، وأنا ملي عيطو ليا الناس وسي فوزي لقجع الصراحة كبرو بيا وجيت للمغرب جوج مرات وجلست مع سي وليد وكلشي كان مزيان”.
وأضاف “أنا فالداخل ديالي فاش اتصل بيا أول مرة ما قداتني فرحة، ولقجع هو أول واحد عيط ليا، واقف على شغلو وهاد الشي اللي فرحني وغير هضر معايا قلت ليه مرحبا حيت البلاد هادي”.
وتابع “هضرنا على المشروع والفكرة وناقشنا شنو نقدر نقدم للبلاد ديالي، طريقة التفكير وطريقة الشغل كلشي كان مزيان، جيت للمغرب جلست مع وليد حتى هو تبارك الله مدرب بحال اللعب ديالو بحال التفكير ديالو وكان واحد التكامل واتفقنا”.
وأوضح “علاش ما مشيتش مع المنتخب، أنا نعاود والجمهور يحكم، انا كملت الكرة في 36 عام رجعت للمغرب جلست 7 شهور، من بعد خذيت قرار باش نقرا وناخذ ديبلومات ديالي فالخارج، على قبل بلادي، حيت كلاعبين وصلنا لمستويات كبرى، ولكن كمدربين ما زال”.
وواصل “جمعت باليزتي ومشيت نقرا، قريت خذيت الديبلومات ديالي، فهاد الطريق ديال 9 سنين كنت فواحد الفريق وهاد الفريق عاوني فكلشي، قراوني وملي وقعو ليا مشاكل عائلية اللي صعاب كنت غنحبس الكرة الفرقة عاونتني، يعني كانو فجنبي طيلة هاد 9 سنين”.
وزاد رمزي “مورا ما اتفقت مع الجامعة، رجعت لهولندا، دخلت عند رئيس الفرقة قلت ليه البلاد ديالي باغاني وهذا هو الحلم ديالي، قال ليا عطيني شهرين حيت أنا كنت من الاعمدة ديال الفريق”.
وتابع “رجعت عند الجامعة قلت ليهم عطيوني شهرين نجمع بين الفرقة ديالي والمنتخب، ومن بعد نكون معكم، ولكن رفضو ومن حقهم حيت هما كانو مضغوطين بالوقت”.
وأشار إلى أنه “فهداك الوقت دخت بين بلادي والفرقة اللي وقفات معايا، جا عندي الواليد لهولندا قال ليا تبع القلب ديالك”.
وختم حديثه بالقول “أنا كون جيت للمغرب ديك الساعة ما غتكونش عندي شخصية وما غنحترمش راسي حيت غنبقى ديما نقول بلي غضرت بهاديك الفرقة اللي وقفت معايا 9 سنين”، مشددا على أنه “أنا ما خويتش ببلادي، وأنا ديك الوقت ما فكرتش بهاد الطريقة ديال غادي نخوي ببلادي”.
