عبر مهنيو النقل الطرقي عن غضبهم من الارتفاع المهول لأسعار المحروقات في المملكة، مطالبين الحكومة بالتدخل وتسقيف الأسعار.
وفي تصريح لموقع “كيفاش”، قال سمير فرابي، الأمين العام للنقابة الديموقراطية للنقل، إن “هاد المشكل ديال ارتفاع أسعار المحروقات شكل واحد العائق كبير للمهنيين”، مضيفا أن “جل المهنيين في جل قطاعات النقل اللي كتستعمل الغازوال بشكل يومي كتعاني من معانات كبيرة”.
وطالب فرابي الحكومة بتحديد سقف أسعار المحروقات، قائلا “حيت يلا بقى الوضع بحال هاكا كنظن أنه غادي تكون شي تنسيقيات نقابية اللي كتواصل دابا في إطار محطات نظالية مقبلة، وكنتمنى أن هاد الأمر يتعالج فأقرب وقت ويتخاذ فيه شي قرار من طرف الحكومة حيت هاد الشي شكل مشكل كبير”.
ومن جهته، قال سائق شاحنة، في تصريح لموقع “كيفاش”، “أنا بصفتي كسائق شاحنة را يلا كنت كناخذ ترونسبور بواحد الثمن وتزاد عليا المازوط را غنزيد فالثمن ملي توصل السلعة… بكل صراحة را حنا تألمنا وبزاف”.
وأضاف “فالعوض اللي كنا كنصورو 200 درهم مثلا في الفياج دابا ملي تزاد المازوط ما بقيناش كنصوروها، ولات غير 150 درهم ولا 140 درهم، وفنفس الوقت ملي كتبغي تمشي تقدا المواد ولا الحوايج اللي خاصينك فالمحل كتلقى كلشي غالي”.
وقال آخر “حنا كنعانيو من الزيادات المتوالية ديال الأسعار، وهاد الشي أثر على الوضعية الاجتماعية ديالنا وعلى الأسر وعلى المستوى المعيشي، حتى ولينا ما كنغطيوش المصاريف ديال العمال ديالنا والمستلزمات ديال الشاحنات”.
وتابع “الأسعار كنعرفو أن السوق الدولية فيها ارتفاع مستمر، ولكن كنطالبو الحكومة تدخل بدعم قطاع المحروقات لمواصلة السير والنمو الاقتصادي ديال البلاد حيت القطاع أصبح مهدد بالوقوف”.
إقرأ أيضا: ثمن المازوط مشنشط.. المواطنين كيتشكاو وصحاب البومبات ما لقاو جهد (صور)
