بعد إعلان الحكومة تفاصيل حول مشروع القانون الجديد المتعلق بالخدمة العسكرية، والفئة العمرية المعنية والحالات التي ستكون معفية، رواد مواقع التواصل الاجتماعي جعلوا من هذه القضية موضوع الساعة.
حماية الوطن واجب وطني
بين الجدية والهزل، مجموعة من رواد الفايس بوك فرحوا فاش سعموا أن التجنيد سيشمل فقط الشباب بين 19 سنة و25 سنة، وقالوا إن الدولة اتخذت قرارا صائبا، خاصة أن هاد الفئة العمرية أغلبها بطاليين ومشرملين. وقال أحدهم: “الحمد لله ما غاديش تكون منهم، ولكن بصاح هاد البراهش داكشي اللي يصلاح ليهم باش يترجلوا”.
كيسولو على راسهم
بعض الشباب اللي كتوفر فيهم الشروط بداو كيسولو داخل المجموعات الفايسبوكية وشنو هي الطريقة باش ما يمشيوش. وكان من بين الأسئلة: ” أنا خدام في القطاع الخاص واش غايدوني؟”. وقال آخر: “أنا عايش خارج المغرب واش يلا دخلت حتى أنا غادي يدوني للتجنيد الإجباري؟”.
سخرية واقتراح أسماء
مجموعة من الرواد، واللي ما على بالهمش بالقرار، اقترحوا مساعدة الدولة في إيجاد هؤلاء الشباب، واللي، حسب تعبيرهم، خاصهم يمشيو للتجنيد الإجباري. وكان من بين هاد الأسماء ناشطين فايسبوكيين ويوتوبرز معروفين بطاليين. كما اقترحوا كذلك فنانين، من بينهم نعمان بلعياشي وزهير البهاوي.