محمد المبارك
المغاربة كيعجبهم الواحد اللي كيدير انتقادات بطريقة هزلية، لهذا كنلقاو باللي فيديوهات خالد شريف دائما من الأوائل في توندونس.
“بلاك موصيبة” واحدة من أكبر القنوات على يوتيوب اللي وصل العدد المتابعين ديالها لأزيد من 782 ألف وعدد المشاهدات الإجمالي 52 مليون مشاهدة.
الهجرة
خالد شريف يوتوبر مغربي عندو 38 سنة، من مواليد قصبة تادلة، شد الإجازة في الاقتصاد وهاجر لكندا وخدم إطار بنكي. ومن بعد الشهرة ديالو على قنوات التواصل الاجتماعي، قرر يرجع للمغرب ويخدم ك”كوميدي فويب”، ومع جرائد كصاحب عمود بالفيديوهات اللي كيدير.
البداية
البداية الرسمية ديالو في عالم اليوتيوب كانت سنة 2012، فاش دار قناة “بلاك موصيبة” على يوتيوب. الاسم اللي خداه من أغنية ديال كروب مغربي اسمو “هوبا هوبا سبيريت”، ودار فيديو أول مرة على “البورطابل” والتأثير ديالو على المجتمع. هاد الفيديو ما لقاش تفاعل كبير، ولكن خالد ما توقفش وكمل بنفس النهج وبقى كيدير فيديو كل أسبوع كيهضر على الوقائع اللي كاينة فالبلاد بطريقته الخاصة.
التلفزة
بعد سنة، خالد شريف غادي يرجع من اليوتوبرز المعروفين، وغادي يجيوه عروض من جرائد يخدم معاها، بحيث كيقاد ليهم فيديو على شي موضوع ديال ساعة ويحطوه في الموقع ديالهم مقابل مبلغ مالي، ومن بعد غادي يلتحق بفقرة تلفزية على قناة مغربية.
الإشهار
ورجوعا الى القناة الافتراضية، خالد شريف فاش وصل 100 الف متابع وغادي يشد الدرع الفضي ديال يوتوب، الشيء اللي غادي يخلي العديد من المستشهرين يعرضو عليه يدوزو وصلات إشهارية في الفيديوهات ديالو.
الطابوهات
واستمر خالد في هاد النهج ودائما كيهضر على شنو واقع فالمغرب بطريقة كوميدية، وواخا كيحاول يهرب ما يهضرش على الدين والسياسية باعتبارهم طابوهات وكرة القدم حيث ما كيعرف عليها والو والسبب أنه ما كانتش كتعجبو من الصغر ، ولكن يبقى شريف واحد من أنجح وأشهر بودكاستر في المغرب واللي كيعطي محتوى يستحق.
