هاد الناس ديال الجزائر الله يعطيهم شي عقل وصافي. منظّمين ألعاب البحر الأبيض المتوسط في وهران، ودايرين “ألعاب” أخرى ديال تاحراميّات مع كل ما هو مغربي.
آش وقع؟
من بعد المسرحية الهزلية بعنوان “الجواسيس” اللي دارتها السلطات الجزائرية، باش تمنع الوفد الصحافي المغربي من تغطية الألعاب، واللي سالات برجوع الوفد، ومريضنا ما عندو باس، دابا جا الدور على وفد القناة الثانية، اللي حتى هو غيرجع.
كيفاش وعلاش؟
اللي واقع، حسب مصدر موثوق، هو أن وفد القناة الثانية، اللي فيه ربعة ديال الناس، منهم صحافي، عياو يتسنّاو باش تعطاهم الاعتمادات ديال التغطية ما داروا معهم والو، وبقاو كيديو ويجيبو فيهم.
إيوا طبعا القناة ما مسالياش غير للألعاب ديال البحر الأبيض المتوسط، وما مسالياش للألعاب ديال السلطات الجزائرية، وما يمكنش تخلّي الناس ديالها منشورين فالجزائر، فكان القرار، حسب مصدر موثوق في دردشة مع موقع “كيفاش”، هو أن الوفد يرجع فحالو وبنّاقص من هاد التغطية.
علي أوحافي
