برلمان ويتك ويتك!!!

اليوم زغبني الله، كيف العادة، وتفرجت فسوق البرلمان. الله يخليها بلية. ما غاديش نهضرو على ديك الفضيحة اللي وقعات، البرلمانيين اللي كنتسناو بركتهم شفاو فيها العديان بغواتهم. هادي ماشي جديدة عند شي وحدين، حيت بعض المرات ما كتبقاش فاهم واش سياسيين ولا رياشيين، شي وحدين فيهم غير ديال… داك الشي اللي على بالكم.
المهم أنا اللي عجبني اليوم هو السيدة اللي كانت مترأسة الجلسة. ويتك ويتك على برلمانية شحال حنينة. والزغبية باش تعرفها ما عندها زهر، ما جات فيها النوبة ديال الرئاسة غير نهار غادي يضارب بوانو مع أبو زيد والشوباني مع وهبي. السيدة تلفات، ما بقى ليها غير تزاوك… وعافاك أحبيبة ديالي حسناء وصافي نعلي الشيطا أحبيبة، وييييييلي يا صاحبتي مالك كتديري بحال هكذا، وصافي هاداك غير بوانو راك عارفاك شوية في شكل…
بيني وبينكم، الواحد يفكر يولي رئيس ديال مجلس النواب. خدمة ساهلة ماهلة.. خاص غير الواحد يحفظ: السيد النائب المحترم، السيد الرئيس المحترم، السيد الوزير المحترم… وها انت طلعتي السربيس.. مخلص وباين فالتلفزة… وجالس فكرسي زوين من الفوق.
تشاو تشاو.