افتتاح السنة التشريعية، أول أمس الجمعة (12 شتنبر)، في مقر البرلمان في الرباط، كل يوم كيعطي موقف ساخر جديد، وبيه كيلقاو الصفحات الفايسبوكية باش يقشبو.
آخر واحد شداتو الكاميرا هو رئيس المجلس الأعلى للحسابات، إدريس جطو، واللي عبارة واحدة قالها رجعات حديث مواقع التواصل الاجتماعي. كيفاش؟
الفيديو اللي انتشر كيبان فيه واحد الرجل مشا عند إدريس جطو وطلب منو شي طلب، وكان الرد ديال رئيس المجلس الأعلى للحسابات هو: “سير عندو وقوليه صيفطني عندك إدريس جطو”.
هاد الرد خلق موجة من السخرية على الفايس بوك، حيث كتب أحد المتابعين ساخرا: “هادي هي الجملة اللي غادي تغير مجرى التاريخ، سعدات اللي مصيفطو جطو”.
وقال آخر: “نهار الاثنين نصبح على الإدارات ونقوليهم مصيفطني حتى أنا جطو”.
ومن جهة أخرى، استصغر البعض الموضوع حيث قال أحدهم: “ماشي ضروري تكون زبونية ومحسوبية كيفما كيحاولوا يروجوا ليها، ممكن عندو شي غرض وخاص اللي وقف معاه، اللي صعيب لو كانت رشوة ولا نصب”.