محمد المبارك
زكرياء الغفولي جا يدير دعوة للناس تحضر للحفل ديالو فموازين صدقو بكاوه. كيفاش؟
الفنان زكرياء الغفولي دار لايف فالفايس بوك، البارح الجمعة (22 يونيو)، حاول يشرح للمتابعين ديالو باللي مقاطعة موازين غير صحيحة، وباللي الفلوس باش طالعة موازين ماشي من المال العام، وإنما شركات الإشهار هي اللي كتمول المهرجان.
هاد اللايف ما عجبش عدد من المتابعين اللي هددو الغافولي، وقالو ليه باللي غادي يسحبو المتابعة ديالهم من الصفحة ديالو، ونشروها في العديد من الصفحات تحت شعار: “كيفما طلعناك حنا غادي نهبطوك”.
ومن بعد ساعة تقريبا العدد ديال المتابعين ديالو نقص بسرعة كبيرة، و هو يدير لايف بدا كيبكي وكيترجى الناس ما يقاطعوهش وباللي كلامو تفهم خارج السياق.
وقاليهم باللي الأم ديالو تأثرات، وختم كلامو قائلا: “اسم زكرياء الغفولي عاد بدا كينتعش عافاكم راني ما تنسوا والو بلا بكم، وسمحو ليا ما كانش عليا نهضر”.
