محمد المبارك
تعرض شاب، صباح أمس الأربعاء (23 ماي)، في مدينة فاس، لاعتداء بالسلاح الأبيض، وهو في طريقه إلى الجامعة، ما تسبب له في جروح على مستوى الساق وكدمات على مستوى أنحاء في جسده.
وحسب ما نشره الضحية على حسابه الشخصي على الفايس بوك، فالشاب كان يقرا مع 11 ديال النهار، وكان غادي في الطريق اللي مولف حتى تلاقاو ليه ثلاثة ديال المشرملين هازين جناوا وبداو كيطعنو فيه في الساق ديالو لأنه حاول يقاومهم، وبقى كيطلب النجدة ولكن اللي داز كيبقى يتفرج.
فاش سالاو السرقة وخداو شنو بغاو، بقى طايح في الأرض وسط الدم ديالو، حتى هزو واحد مول التريبورتور وداه للطبيب.
بقى نصف ساعة في السبيطار، وحتى طبيب أو ممرض ما جا عندو، لدرجة واحد الطبيب فاش هضر معاه غوت عليه وقاليه ما دويش معايا، ولو ما كانوش بعض الممرضات المتدربات لو كان بقى تم، وحتى هاد المتدربات لقلة خبرتهم دارو ليه بنج في ساق والأخرى لا، والحصيلة خمسة ديال الغرزات، وعدم القدرة على المشي حاليا.
ما زال ما سالاتش القصة ديال ياسين وأكفس نهار فحياتو، لأنه بحكم أنه كيقرا خاصو شهادة طبية باش يبرر الغياب ديالو، ولكن السيد المكلف كونجي، وقالو ليه سير لسببطار الغساني باش تاخذ الشهادة، ولكن لقاه عامر ومابغاوش يستقبلوه ولا يهضرو معاه.
وحتى من ناحية الأمن بقى كيدور بين ثلاثة ديال الكوميساريات عاد لقى اللي يجاوبو، ودار المحضر ضد عصابة مجهولة.
