من بعد ما كانو الفنانة كيتسابقو على الأغاني ديال المنتخب المغربي، وكل فيهم كيحاول يشجع أسود الأطلس أو يجمع المتابعين باسم المنتخب الوطني، هاد العام الفنانة صاقلين وحتى واحد ما خرج شي أغنية.
“كان 2019” الحدث الرياضي الأبرز هاد العام غادي يدوز بلا أغاني، وحتى الفنان حاتم عمور اللي معروف بالحب ديالو لكرة القدم، ما دار حتى أغنية، ولكن خرج راسو من باب واسع وبدل الصورة ديال الأغنية ديالو السابقة “فيفا ماروكو” اللي دعم فيها المنتخب في كأس العالم، بصورة جديدة مكتوب عليها “كاف 2019”.
وبكثرة لعكز اللي فيه، أو فالسيد اللي مسؤول على القناة الرسمية ديالو على اليوتيوب، ما كلفش راسو حتى يعرف الفرق بين “الكاف” اللي هو اتحاد الكرة الإفريقي و”الكان” اللي هي بطولة كأس الأمم الإفريقية.
فجميع الأحوال، المنتخب المغربي هاد العام تبعو بزاف ديال الصداع، والواضح أنه هادي هي أحسن حاجة، يدوز بلا غناء، حتى نشوفو هاد الشي فين غادي.
