السي عبد الإله بنكيران اللي ترجينا بركتو جاب الزيادات معاه فلحيتو. الحكومة، الله يسمح ليها، ناوية تدير فينا واحد المنكر تاريخي، وبذلك ستدخل التاريخ، إلى درجة أن المغاربة سيلعنون الربيع العربي اللي عطا هاد الزعامة كاملة لبنكيران.
قاليك أسيدي غادي يحايدو صندوق المقاصة، وغادي يعطيو للناس اللي ما فحالهمش شي 500 ولا 600 درهم باش يخلصو الفرق فالثمن ديال البوطا والدقيق والسكر… هاد الشي مزيان، ولكن ديك الطبقة المتوسطة مسكينة شكون يشوف من حالها؟
المنكر ماشي هو إصلاح صندوق المقاصة، ولكن هو أن البلاد 40 عام وشي بعضين كيمصو فيها، وملي جا وقت الإصلاح خاص اللي خدام بذراعو هو اللي يخلص بوحدو، وهادوك اللي ردو البلاد فيها الشلل النصفي يتفرجو فينا.
أسيدي مرحبا بالإصلاح، ويلا البلاد ما عندها فلوس نديرو يد الله معاها، هادي بلادنا الله غالب، ولكن كلشي يخلص، ونبداو من هادوك اللي عندهم الفلوس بزاف وشبعو صفقات، ونمشيو عند هادوك اللي شفرو الصناديق، ونرجعو لهادوك اللي عندهم الكريمات.
علاه تعرفونا غير فالأزمة. أنا بعدا ما لاعبش.
تشاو تشاو.
