أرا برع. دابا غير اللي ما بغاش يمرض. هادي هي الفرصة. مالين الشكارة غادي يدخلو للضومين. والسي الوردي شاد فكلامو… اللي عندو الفلوس يبني كلينيك، وأراك للمنافسة، ومول المليح باع وراح!
المهم ما غاديش نسبقو الفرح بليلة، ولكن، على ما كيبان، ملي غادي يدخلو صحاب الشكارة للضومين ديال الصحة غادي نتفششو مزيان، وبنادم واخا يكون شادو الوجع، ولا جاتو شي كريز، غادي ياخد وقتو باش يختار فين يداوى. الكلينيكات غادي يوليو فالمغرب بحال المحالات ديال الحوت، غير بيان ليهم الكليان كيبقاو يرغبو فيه ياخد الطبلة.
تصورو معايا واحد مريض فلامبيلانص والشيفور كيدور بيه فشي حي عامر كلينيكات، وكل ما وصل لشي كلينيك يخرج ليه الماجور لابس الطابلية: مرحبا أخويا، زيد زيد، خود ليك شي باياص، ندير معاك ثمن زوين، يالاه أخويا كلشي ديالك…
المريض يسمع بحال هاد الكلام ويزيد يتفشش، يقول لمول لامبيلانص: لا هادا ما عجبنيش، بان لي خاوي، سير لعند هاداك اللي فالشوكة كيطيب مزيان… زعما كيداوي مزيان، والخيط عندهم دوريجين، والفرمليات زعيعرات.
الواعرة هي ملي تقوى المنافسة غادي يقتلونا بليصولد… أراك للإشهارات واللافتات… كلينيك الورد: دير عملية على القلب تربح عملية على الرية. كلينيك التفاح: ولدي 3 ديال المرات وخلصي غير جوج. كلينيك السعادة: مرض كيف بغيتي… فتح دابا وخلص على خمس سنين. كلينيك الحب: جوج إيطرو ديال الدم بثمن إيطرو… ويلا ما عجبكش ردو لينا…
الحاصول القضية غادي تزوهر مزيااااااان، وماشي بعيد نلقاو شي كلينيك دايرة فالإشهار ديالها: اختار الدم اللي بغيتي.. بارد، سخون، نص نص… اختار القلب اللي بغيتي.. أبيض ولا كحل… ويمكن نلقاو شي كلينيك دايرة أوفر للي بغا يبات بزاف… باياص ليك وباياص للي عزيز عليك…
الله يجيب الشفا للجميع…
تشاو تشاو…
