• بالفيديو.. مسؤولون ومواطنون يبكون حزنا بعد مرض زعيم كوريا الشمالية
  • بعد الانفصال الرسمي.. رحيل وحيد خليلوزيتش يمر بكل هدوء وبلا حسرة!
  • بأكثر من مليار سنتيم.. تحديث وإنشاء 5 قاعات سينمائية
  • سفير المغرب في بكين: المغرب يدعم مبدأ “الصين الواحدة”
  • كانوا ضاربين الطمّ.. هآرتس تكشف استخدام 12 دولة أوروبية لبرمجيات تجسس إسرائيلية
عاجل
الخميس 07 يوليو 2022 على الساعة 20:54

واش نتيّقو وزارة الفلاحة ولا السوق؟.. ثمن الحولي بين 2000 و4200 درهم!

واش نتيّقو وزارة الفلاحة ولا السوق؟.. ثمن الحولي بين 2000 و4200 درهم!

طارق باشلام

تصريحات وزير الفلاحة المكتوبة والمسموعة والمتلفزة، ما كاينش اللي ماتبعهاش، لا في المجلس الحكومي، ولا في مجلسي النواب والمستشارين في إطار الأسئلة الشفهية، الوزير كان قال التصريح ديالو المشهور باللي “ثمن الحولي بادي من 800 درهم، والخير موجود، وكلشي يقدر يشري الأضحية”.

حولي بـ 800 درهم!!

في المقابل، الكسابة على مواقع التواصل الاجتماعي، كاين فيهم اللي قال باللي ” كيحشم يذكر حتى ثمن الأضحية للزبائن وأنه ما عليه والو حيت الزيادات جاية من العلف”.

ويلا كانت هادي غير هضرة السوق اللي طالع ونازل والكسابة اللي ممكن يكونو كيقلبو على البوز بحال شي تلاميذ طلعو فالطوندوس بتصريحاتهم “المستفزة”، أجي نشوفو نظام الأسعار الرسمي ديال وزارة الفلاحة، اللي ما معاهش اللعب، واللّي حتى هو كيأكد الارتفاع الصاروخي في أثمنة الأضاحي هذه السنة، وما جبدش نهائية 800 درهم.

نظام الأسعار الرسمي، كيأكد باللي ثمن الحولي على الصعيد الوطني كيتراوح ما بين 2000 و4200 درهم للرأس وهذا في المتوسط، مع العلم، وخا هادشي ما قالتوش الحكومة، كاين حاولي البريستيج، اللي يقدر يوصل حتى 6000 و7000 درهم.

وكتضيف الوزارة باللي 50 في المائة من الأسعار المعاينة تقل عن 2800 درهم، هادشي بلا مانتكلمو على الحولي واش متوفرة فيه الشروط. ونظام الأسعار، وضعته وزارة الفلاحة للمراقبة اليومية لمجموع السلاسل الفلاحية، ماشي غير المواشي، وفيه حتى الفواكه والخضر والحبوب والقطاني، وعلى مستوى مراحل البيع الأربعة من الجملة، للتقسيط، وحتى للمساحات التجارية المتوسطة والكبرى، والأسواق الأسبوعية.

عدّي بالمعزي

لحسن الحظ، كاتبقى عند الناس حلول أخرى، كاين اللي كيفضل أضحية أخرى من غير الحولي، يلا صحتو ما كاتسمحش ولا القدرة الشرائية ديالو ما مساعداهش أو ما عندوش مع الغنمي، النعاج تتراوح الأسعار ما بين 900 و1700 درهم للرأس، 50 في المائة من الأسعار التي تمت معاينتها تقل عن 1200 درهم.
وبالنسبة للماعز، تتراوح الأسعار ما بين 500 و1100 درهم للرأس. 75 في المائة من الأسعار التي تمت معاينتها تقل عن 1000 درهم.
وبالنسبة للتيس، تتراوح الأسعار ما بين 850 و1950 درهم للرأس. 50 في المائة من الأسعار التي تمت معاينتها تقل عن 1300 درهم.