من بعد ما دار حلقة حول “تعويم الدرهم” فمارس اللي فات، مصطفى الفكاك، المعروف بـ”سوينغا”، غادي يدير حلقة أخرى على هاد الموضوع، واخا الحكومة، اللي معنية فالموضوع، ما زال ما شرحات للمغاربة شنو هو هاد التعويم.
مقدم برنامج “آجي تفهم” على اليوتوب كتب تدوينة على الفايس بوك: “ما بقا والو على الخطوة الأولى فتحرير سعر الصرف فالمغرب الحمد لله الفيديو لي صوبنا كتشرح هاد الموضوع عونات بزاف ديال الناس باش ايفهمو اشنو غادي ايوقع او فنفس الوقت خلات اسئلة كثار عند بزاف منكم”.
وتابع: “هدا علاش غادي نصورو حلقة خاصة لي غادي تكون فقناة أجي تفهم فاليوتوب كنجوبو فيها على كل تساؤلاتكم مع أحد المسؤولين الكبار لي خدمو على هاد القرار من الاولى”.
وأضاف سوينغا: “غادي نكونو فبلاطو تصوير ديالنا صوبناه خصيصا لهاد الغرض او غادي ندويو بطريقتنا المفروحة ديال أجي تفهم مع مسؤول عالي المستوى، على لله ايكون مفروح بحلنا او ايجاوبنا على الاسئلة لي خليتو لينا او لي غادي تخليو لينا فتعليق أو إقنعنا بهادشي لي غادي ايطرا فالبلاد، قرار فعلا ماشي ساهل خاصو اياخذ حجم ديالو”.
