• الطيارة اللي كراو باش يطفيو العافية خسرات.. النظام الجزائري يضع حياة مواطنيه على كف عفريت! (فيديو)
  • أوناجم الغالي فيهم.. شحال القيمة السوقية ديال اللعابة الوداديين الجداد؟
  • المبادرة الوطنية للتنمية البشرية.. أزيد من 100 ألف مستفيد من منصات الشباب
  • المنتخب الوطني.. زيارة المدرب الإيطالي ماتزاري للمغرب تثير الجدل
  • ما بقات ممانعة.. لاعبون جزائريون في إسرائيل لخوض مواجهة ضد ماكابي تل أبيب
عاجل
الأحد 10 يوليو 2022 على الساعة 12:00

لقجع حالف ما يفكّ المغاربة مع العواشر.. واش مشى وحيد وجا وليد؟

لقجع حالف ما يفكّ المغاربة مع العواشر.. واش مشى وحيد وجا وليد؟

وحيد خليلوزيتش باقي هو الناخب الوطني رسميا، وبزاف ديال الإشاعات كتروج على أن وليد الرگراگي هو اللي غادي يشدّ بلاصتو، ولحدود الآن حتى واحد ما عارف شنو كاين.

آش واقع؟
هادي سيمانة والشارع الرياضي فالمغرب كيتسنى الإعلان ديال الجامعة الملكية المغربية لكرة القدم، على شنو قررت تدير مع الناخب الوطني وحيد خليلوزيتش، واللي كان من المنتظر يخرج القرار قبل العواشر، والمتابعين للشأن الكروي يدوزو العيد الكبير على الخير. ولكن لحدود ليلة العيد ما كاين والو، بل الجامعة الملكية فنص الليل، خرجات ببلاغ رسمي كتنفي فيه إقالة وحيد خليلوزيتش وكترد على إشاعة تعيين وليد الرگراگي بلاصتو.

علاش؟
هاد الانتظار ما جاش من فراغ، لأن فوزي لقجع رئيس الجامعة الملكية المغربية لكرة القدم هو براسو اللي جبد النحل، حيث الأحد اللي فات، داز فإذاعة “إم إف إم”، وقال باللي هاد الأيام القليلة اللي جاية غادي يخرج القرار الأخير بخصوص وحيد خليلوزيتش، وكلامو كان من بعد انتقادات لاذعة قالها فحق البوسني، وأنه ما بقاتش كتعجبو طريقة اللعب ديالو والاختيارات اللي كيدير، وما كيفرضش شخصية المنتخب الوطني على الخصوم، وبزاف ديال النقط اللي داخلة في أبجديات الكرة.
واللي سمع هاد الكلام، غادي يقول لقجع غاضب على وحيد، وغادي تكون الإقالة هاد السيمانة.

كيفاش؟
من جهة أخرى، التعليقات ديال الناس على الشائعات والتضارب ديال الأنباء، خلى بزاف ديال المتابعين ما يعجبهمش هادشي، خاصة أنه منذ مدة والشائعات كثيرة وكل مرة كيخرج خبر باللي شي مدرب جا للمغرب وغادي يكون بلاصة وحيد خليلوزيتش وفي الأخير ما كيكون والو.

هاد المتابعين للشأن الرياضي جاهم باللي الجامعة الملكية المغربية لكرة القدم مازال ما حددت موقف نهائي من الناخب الوطني بالرغم من أن تصريحات فوزي لقجع كان باين الاتجاه ديالها، زائد ما بقاش بزاف على كأس العالم وعدد من الأندية الأوروبية رجعات اللاعبين ديالها للتداريب، ولاعبين آخرين كيقلبو على أندية جديدة، وهادشي كامل خاص يكون تحديد لشكون غادي يسوگ تران أسود الأطلس فالمونديال الجاي، ويبدا الخدمة من دابا، باش على الأقل تكون مشاركة أحسن من ديال 2018، واللي رجعو فيها الأسود بنقطة واحدة وجوج أهداف فقط.