• الطيارة اللي كراو باش يطفيو العافية خسرات.. النظام الجزائري يضع حياة مواطنيه على كف عفريت! (فيديو)
  • أوناجم الغالي فيهم.. شحال القيمة السوقية ديال اللعابة الوداديين الجداد؟
  • المبادرة الوطنية للتنمية البشرية.. أزيد من 100 ألف مستفيد من منصات الشباب
  • المنتخب الوطني.. زيارة المدرب الإيطالي ماتزاري للمغرب تثير الجدل
  • ما بقات ممانعة.. لاعبون جزائريون في إسرائيل لخوض مواجهة ضد ماكابي تل أبيب
عاجل
الثلاثاء 12 يوليو 2022 على الساعة 19:52

بالخشيبات.. نجيب المختاري يشرح أهمية صور “جيمس ويب”

بالخشيبات.. نجيب المختاري يشرح أهمية صور “جيمس ويب”

نشرت وكالة الفضاء الأميركية “ناسا” المزيد من الصور التي التقطها تلسكوب “جيمس ويب”، لتعلن عن بداية حقبة جديدة في علم الفلك.

وفي هذا الحوار يقربنا نجيب المختاري، المدون المختص في تبسيط العلوم من أهمية هذه الصور، والفتح الذي أعلنت عنه في علم الفلك.

وصفتي الصورة اللي نشرتها وكالة “ناسا” البارح بـ”الأسطورية”، علاش هاد الوصف؟

هاد الصورة هي أولى صور الحقل العميق ديال تلسكوب “جيمس ويب”، وحتى تلسكوب “هابل” كان خدا صور من هاد النوع هاد اللي هوما صور لأبعد ما ممكن فالسما، وفعلم الفلك كلما كانت الصور أبعد كلما كانت أقدم، وهادو كذلك هوما أقدم صور تم التقاطها للمجرات فالكون.

واستعملت كلمة أسطوية لأن هاد الصورة عندها دلالة إنسانية، كتخلينا نفكرو فالمكان ديالنا فالكون.

شنو الأهمية ديال هاد الصورة؟ وشنو المميز فيها؟

هاد الصور كيبينو باللي الكون يعج بالمجرات والنجوم والبنيات الفلكية اللي كاينين فالسما، وعدد المجرات اللي كاينين فديك الصورة يقدر بألاف المجرات وكل مجرة فيها ملايير النجوم وكل نجم فيه كتعتبر بحال شمس من الشموس، بحال الشمس اللي كتضوي علينا هي نجمة من بين هاد الأعداد الهائلة من النجوم اللي كاينين فالسما.


(إحدى الصور التي نشرتها وكالة “ناسا” اليوم)

والأهمية ديال هاد الصور هي أنها ذات بعدين، بعد علمي تقني، اللي غيمكن العلماء من التعرف أكثر على هاد المراحل من الكون، وبعد إنساني اللي هاد النوع من الصور كيخلق فينا واحد النوع من الرهبة ونوع من التأمل أمام رحابة الكون، وممكن نقولوا أن الإنسانية كتفتح الأعين ديالها، لأول مرة فتاريخ البشرية الطويل، وكتكتشف المكان ديالنا فهاد الكون الراحب الشاسع، وأن هاد القنيت اللي حنا فيه وهاد الشمس ديالنا وهاد كوكب الأرض ديالنا، هو واحد ذرة غبار كتسبح فكون يعج بالبنيات الشبيهة.

إقرأ أيضا: أبعد وأدق صورة ملونة للكون على الإطلاق.. “جيمس ويب” يُبهر العالم!

ممكن تشرح لينا بطريقة مبسطة كيفاش تم التقاط الصورة؟

الصور التقطت بواسطة تلسكوب “جيمس ويب”، وهو تلسكوب موجود فالفضاء وتم الإطلاق ديالو في دجنبر 2021، وموجود فمدار كيسمح لو بتبريد المستقبلات ديالو باش يكون قادرين على التقاط الضوء الخافت جدا ديال النجوم اللي كاينين بعاد، وهاد الصورة بما أنها ديال الحقل العميق أو المجرات البعاد فالكون فكيوصلنا منهم ضوء خافت جدا، لذلك كيحتاجو لهاد النوع من التلسكوبات، و”جميس ويب” هو تلسكوب الوحيد القادر على التقاط صور من هذا النوع.

هاد الصورة تخدات فمدة ديال 12 ساعة ونص ديال le temps d’exposition ولا الوقت اللي بقاو فيه العدسات ديال التلسكوب محلولين وكيلتقطو أي ضوء خافت جاي من ديك المنطقة فالسما.


(إحدى الصور التي نشرتها وكالة “ناسا” اليوم)

المساحة اللي كتغطيها ديك الصورة هي مستحة صغيرة بزاف، باش تعرف هاد المساحة كتاخد حبيبة صغيرة ديال الرملة وكتحطها على صبعك وكتمد ذراعك وكتشوف فالسما هاديك المساحة اللي كتغطيها ديك الحبة ديالالرملة فالسما هي المساحة اللي كتغطيها ديك الصورة.

أشنو غادي تغير هاد الصور في علم الفلك وكيفاش ممكن تعاون المختصين في هاد المجال؟

هاد الصور كتمكن من التعرف على واحد المرحلة من الكون اللي جات بعد الانفجار العظيم (الانفجار العظيم هو اللحظة الصفر اللي كانت فيها الطاقة والمادة ديال الكون كانت مجموعة فواحد النقطة ولا واحد الحيز الفضائي، اللي من بعد توسع بفعل الجاذبية وعطانا النجوم والمجرات.

هاد الصورة هي غتكون وحدة من بين الصور اللي تخادو لأولى المراحل اللي بانو فيه النجوم فتاريخ
الكون.

هاد الانفجار العظيم نتج عليه واحد سحابة ديال غاز الهيدروجين اللي كانت موجودة فالكون كامل، بعد هاد السحابة غتنهار بفعل الجاذبية وغتتشكل أولى النجوم فالكون، اللي غيتكثلو مع بعضياتهم وغيشكلو المجرات، اللي هي هاد الصورة اللي تخدات.

هاد الصورة هي مرحلة جديدة اللي كيتم التعرف عليها من طرف العلماء عن طريق صور مباشرة كتمكن من التعرف على الكون فهاد الحقبة هادي ديال بداية أولى النجوم والمجرات فالكون، وغتمكن من التعرف على بداية الكون ومنين جاو هاد البنيات اللي كاينين فالسما وكيفاش تطورو فتاريخ الكون.