مشاهد كثيرة كتوقع مع صحاب الكرويلات، وخاصة دراري الصغار اللي ما كتكونش عندهم دراية بالقانون، قبل شي شهور، واحد الدري كان كيدور بالكرويلة ديالو فكازا، وفالطريق ترامواي، وهذا تصرف كيشكل عليه خطر، ومؤخرا بأن فيديو جديد ديال دري بغى يدخل بالكرويلة للأوطوروت.
الفيديو اللي المدة ديالو 2 دقايق وما واضحش إمتى تصور، كيبان فيه مول الكرويلة اللي هو دري صغير فالعمر، باغي يدخل للأوطوروت باش يمشي لسلا، والمصور ديال الفيديو، كيضحك عليه، وكيقول للسيد اللي مكلف بالبياج، حل ليه أنا نخلص.
هاد المقطع اللي تفاعل معاه عدد كبير من رواد مواقع التواصل الاجتماعي، كيبين باللي واحد المجموعة ديال الناس، رجعو كيقلبو على أي حاجة باش يديرو البوز ويرجعوها ضحك، حيث هاد السيد لو كان بصاح باغي المصلحة العامة، غادي يشرح لمول الكرويلة، اللي باين أنه ما عارفش باللي ممنوع عليه يدخل، ويوريه الطريق الوطنية منين يقدر يدوز، ولكن مول الفيديو استغل الفرصة وبغا كيضحك على الدري، وكيقول عبارات خايبة واحتقارية.
