• مشكلة حمد الله/ الإقصاء من الكان/ المحليين مع الأسود.. فيصل فجر في حوار حصري مع موقع كيفاش
  • عروض خليجية وقرار الطاس.. سبب تعثر انتقال الحداد إلى الزمالك المصري
  • جريمة “اغتصاب وقتل حنان”.. الأمن يعتقل 8 أشخاص آخرين
  • خلاف بين حارس أمن خاص وعامل بناء.. مديرية الأمن تكشف حقيقة تعرض مقر “دوزيم” لهجوم
  • عاجل.. الإعدام لمنفذي جريمة “شمهروش”
عاجل
الإثنين 02 يوليو 2018 على الساعة 21:36

بالصور.. يوسف الناصيري ما نساش الأصل ديالو

بالصور.. يوسف الناصيري ما نساش الأصل ديالو

محمد المبارك

الأغلبية ديال المغاربة تعرفو على اللاعب يوسف الناصيري في الهدف ديالو ضد منتخب إسبانيا في كأس العالم في روسيا، هدف عالمي قدم بيه الناصيري نفسو كواحد من اللاعبين الكبار اللي غادي يكونو حجر الأساس في المنتخب المغربي.

يوسف الناصيري كانت البداية ديالو مع نادي من أندية الأحياء في فاس، وهو “نادي الشروق”، واللي يوسف ما زال عندو ذكريات معاه، وكل مرة كيتفكرهم بشي حاجة عربون للخير ديالهم.

كريم القصير، رئيس النادي الحالي، قال، في حديث مع موقع “كيفاش”، “يوسف الناصيري بحال ولدي، وكبر قدامي، وفاش كان هنا كنت أنا الكاتب العام ديال الفريق، ومن بعد يوسف انتقل للمغرب الفاسي ومن تما لأكاديمية محمد السادس، ثم دخل للاحتراف مع نادي ملقة، و كنا فرحانين بزاف أن طفل من عندنا وصل لدوري قوي بحال إسبانيا وكيلعب فـ’كامب نو’ و’سانتياغو بيرنابيو'”.

سولنا القصير واش الناصيري باقي كيتفكر النادي ديالو، فقال: “كيفاش غادي ينسى النادي الأم ديالو، وهو خوه مدرب عندنا، هادي راه دارهم الثانية ماشي غير فريق الطفولة بالنسبة ليه، ومرة مرة كيصيفط الأحذية الرياضية للدراري وكيصيفط كرات عالية الجودة، وفاش كيجي كيزور الدراري وكيلعب معاهم ويعطيهم نصائح”.

وحول وجود لاعبين آخرين تخرجوا من النادي قال كريم القصير: “كاين الأخ ديال يوسف، محمد أمين النصير لاعب الماص والآن سيدي قاسم، وعثمان المسيح في فريق الوفاء الرياضي الفاسي، والمهدي الجمعاوي حارس مرمى فالمغرب الفاسي، وآخر العنقود هو حسام الخلفي لاعب بأكاديمة محمد السادس، ونور الدين الوالي العلمي اللي انتقل لفريق الواف ثم لفريق شباب الكواكب الفاسي”.

وختم رئيس نادي الشروق كلامو بالقول: “أتمنى يكون بعض الدعم لأن هاد الأندية ديال الأحياء هي اللي كتعطي المواهب، ولكن خاص ضروري المتابعة والتجهيزات”.