• بالصور من أكادير.. حزب الأحرار يطرح تصوره المرجعي والسياسي
  • قضية بوعشرين.. إخلاء سبيل الصحافية أمال الهواري بعد الاستماع إليها
  • عن عمر يناهز 80 عاما.. وفاة جد ميسي
  • بالصور.. “خادمات” مغربيات للبيع في السعودية!!
  • أكد على تطبيق القانون.. أوجار يرفض التعليق على اعتقال بوعشرين
عاجل
الجمعة 09 نوفمبر 2012 على الساعة 15:59

وهبي لمالين الزريعة: ما تخليوش شي حد يخاصمنا معاكم

وهبي لمالين الزريعة: ما تخليوش شي حد يخاصمنا معاكم

 

محمد محلا

عبد اللطيف وهبي، رئيس فريق الأصالة والمعاصرة في مجلس النواب، قدم اعتذارا، عبر موقع “كيفاش”، إلى مالين الزريعة، وهو الذي سبق أن قال، في اجتماع للجنة المالية في الغرفة الأولى، في سياق انتقاده لمشاريع السكن الاجتماعي المخصص للطبقة الوسطى، إن “هذه المشاريع بعيدة عن الواقع”، وأعطى المثال على ذلك بمشروع المدينة النموذجية “تامسنا”، حيث قال إن هذه المدينة “ما تصلح غير لشي شلح يبيع فيها الزريعة”.

وهبي قال: “الله يحفظكم ويطول لينا فعمركم ما تخليوش شي حد يخاصمنا معاكم”. كما أوضح أن حزب العدالة والتنمية كيحول كلام الأصالة والمعاصرة.

 

 

 

سي وهبي كتاكل شوية الزريعة؟

كناكلها باستمرار.

 

ومالك هاد الأيام مع مالين الزريعة؟ راهم كاعيين عليك شوية؟

لا لا، غير هادوك اللي كيعتبرو نفوسهم أوصياء على الناس جميعا هوما اللي كاعين عليا، أما مالين الزريعة راهم أصدقاء ديالي، وفيهم اللي من البلاد، وعندي معهم علاقة جيدة، ولحد الآن علاقتنا طيبة، ويلا دزت من الحانوت كيعطيوني الزريعة وكناكلها، وما عندنا مشكل، راه كنتكلمو بالشلحة في العشية وفي الصباح، هوما ما عندهم عقدة مني وأنا ما عندي عقدة منهم.

 

آش وقع بالضبط؟

كنت كنتكلم بشكل عام، وقلت راه هاد البلاد خاصها استثمارات وبركة من هاد الحوينتات ديال الزريعة، وما قصدش الإهانة، ولكن بغيت نقول راه منطقة سوس فيها استثمارات وما يمكنش تقبل أن في مناطق كيضوبلو السكة الحديدية ومناطق حرة، وحنا في سوس ما عندنا سكة حديدية لا منطقة حرة لا مناطق للمعامل، يلا بغاو يخليو الوضع هاكا هذا شغلهم، ولكن سمح ليا أنا ما يمكنش نسكت.

 

ولكن أعضاء في حزب العدالة والتنمية كيقولو باللي طالبو باعتذار ورفضتي. واش هاد الكلام بالصح؟

واش نعتذر لعائلتي؟ ولا نعتذر للوالد ديالي اللي شلح؟ ولا نعتذر للوالدة ديالي اللي ريفية؟ الوالد ديالي شلح من سوس كيعرفوه الجميع، والوالد ريفية وتربات بين الشلوح، وكنتكلم الشلحة وقريت مع الشلوح وعشت معهم. هوما بغاو يفرقو الولد مع عائلتو، راه العدالة والتنمية بغات تحكم باش ما، ولا يفجرو الأوضاع بين العائلات، باش تشوف العقلية مع من كنتعاملو.

 

هاد الأيام ولى غير البوليميك الخاوي، ها مالين الزريعة ها السيارات ديال بنشماش وبنكيران. واش هادي هي السياسة؟

وهوما اللي نزلو لهاد المستوى (العدالة والتنمية)، كيتكلمو على التماسيح وكيتكلمو على العفاريت آش مطلوب منا نديرو، قلنا ليهم أجيو نناقشو الاقتصاد ما بغاوش، قلنا ليهم أجيو ناقشو الاستثمارات ما بغاوش، بغاو هاد الكلام آش نديرو ليهم.

هوما اللي كيحولو كلامنا لهاد الشي هادا، أما حنا الكلام ديالنا يلا خديتيه في السياق راه ما فيهش هاد المعنى، راه كياخدو جملة من الكلام ديالنا وكيستخدموها باش يضربونا بيها، ولكن هادي طريقة قديمة وما بقاتش نافعة، يلا بغا شي حد يحكي يحكي الكلام كولو، ماشي يحكي من الكلام داك الشي اللي عجبو باش يستعملو ويخدم بيه.

 

شي كلمة لمالين الزريعة باش نصفيو القلوب.

الله يحفظكم ويطول لينا في عمركم ما تخليوش شي حد يخاصمنا معاكم، أنا ديالكم وأنتوما ديالي، ولا إله إلا الله.