• سنة 2018.. 35 ألف مغربي في مراكز الإدمان!
  • بالصور من أكادير.. ها الأمن الطاقي اللي هضر عليه العثماني!!
  • اليوم الأحد.. أمطار رعدية
  • خبيرة تجميل عالمية: هيفاء وهبي هي مارلين مونرو العرب (فيديو)
  • صفعة جديدة.. البرلمان الإسباني يطرد البوليساريو من مقره
عاجل
الإثنين 28 مايو 2018 على الساعة 00:40

مصطفى الفكاك/ سوينغا.. غوغل كون كان بنادم!

مصطفى الفكاك/ سوينغا.. غوغل كون كان بنادم!

محمد المبارك

الطوندونس في اليوتيوب في أغلب أوقات السنة، كتكون فيه فيديوهات الغناء، أو فضيحة من الفضائح، أو حدث شغل الرأي العام، هاد الشي اللي كيخلي أغلب اليوتوبرز يلعبو على هاد الجانب في الفيديوهات ديالهم، سوا يهضرو عليها بطريقة هزلية، أو ينشروا الفيديو نفسو بحثا عن عدد المشاهدات.
مصطفى الفكاك، الملقب ب”سوينغا”، اختار توجه مختلف عن الجميع، الشي اللي خلاه يكون واحد من المؤثرين المغاربة على مواقع التواصل الاجتماعي، والقناة ديالو وصلات ل285 ألف مشاهد في 3 سنوات، وبعدد مشاهدات تجاوز 8 ملايين ونصف.
مصطفى الفكاك من مواليد مدينة الدار البيضاء سنة 1986، حاصل على بكالوريا علمية، وشهادة تقني في الشبكات المعلوماتية، ومن بعد التخرج ديالو خدم في شركة لمدة سنة، ومن بعد توقف.
التوقف ديالو ما كانش بدون سبب، وإنما مصطفى كانت عندو هواية ديال السيرك وقرر يدخل للاحتراف. مشا قرا فالمدرسة الوطنية للسيرك فسلا لمدة ثلاث سنوات، وتخرج كفنان سيرك مؤدي، ومخرج مسرحي متخصص في السيرك .
مصطفى كان عندو هواية صناعة الفيديوهات، واللي كان كيديرها بالموازاة مع السيرك، ومن بعد قرر يتخلى على السيرك ويركز على صناعة الفيديوهات فقط.
وبالنسبة للفيديوهات وعالم اليوتيوب، اللي تشهر فيه، دخل ليه مصطفى أول مرة سنة 2011، مع مجموعة من الشباب دارو سلسلة ديال الهواة، ومن بعد مدة قصيرة دخل مع اليوتوبرز عبد الله ابو جاد، وبداو تيديرو فيديوهات على التوجه المدرسي، وهي يشرحو للناس. تجربة دازت لمدة سنتين، ومن بعد مصطفى غادي يقرر يخدم بوحدو.
سنة 2015 غادي تكون أول بداية لمصطفى الفكاك كعمل شخصي ديالو، واللي سماه “أجي تفهم”، قناة مختلفة جدا على المواد اللي كانت فيوتوب، ولحد الآن، هاد الفكرة ما زال ما دارها حتى واحد، واللي كتركز على مصطلحات ومفاهيم رايجة في المجتمع ولكن حتى الناس غالطين فيها .
كان أول فيديو في سنة 2015 على داعش، ودار تعريف بطريقة بسيطة عليهم اللي لقى إقبال ووصل فيديو لنصف مليون مشاهدة، وهو رقم عالي بالنسبة لفيديو ثقافي بالدارجة المغربية.
من بعد دار فيديوهات أخرى متنوعة، على شرح الانتخابات، ثم مسار الطب، وداز لمشكل الأساتذة المتدربين، وفي نفس الوقت دار صفحة للقناة على الفايس بوك، كيحط فيها تدوينات رأي، أو شرح لبعض المواضيع.
فسنة 2018 غدي يتعرف مصطفى أكثر، وهاد الشي راجع للاختيار الجيد للمواضيع اللي شاغلة المغاربة. وتزامنا مع “تحرير سعر الدرهم”، اللي كان دار عليه فيديو قبل عشرة أشهر على تطبيق القرار، الناس ما فهموش هاد المفهوم، وكان فيديو ديال “سوينغا” هو أحسن فيديو اللي بغا يفهم شنو واقع، فيديو اللي وصل 2.8 مليون مشاهدة وخلى قناة “أجي تفهم ” تتعرف كثر.
وفي شهر أبريل، مع حملة “المقاطعة”، نشر فيديو حول أسعار المحروقات في المغرب وشنو كيتحكم فيها، فيديو اللي اعتمدته العديد من الجرائد الإلكترونية وحطات الرابط ديالو باش يشرحو بيه هاد المفهوم، واقترب للمليون في ظرف أقل من 3 أسابيع.
مصطفى الفكاك “سوينغا” هو موقع البحث “غوغل” كون كان بنادم.