• مارتيل.. سائح كندي يضع حدا لحياته شنقا في فندق!
  • المصادقة على مشروع قانون المالية في غياب 113 برلمانيا.. شوهة جديدة في مجلس النواب!
  • انسحبوا من الجلسة.. غياب الوزراء يغضب برلمانيي البام والاستقلال
  • بالصور من فاس.. إصابة 14 شخصا في انقلاب حافلة
  • الخليع: التيجيفي لجميع المغاربة وليس لرجال الأعمال فقط
عاجل
السبت 06 يناير 2018 على الساعة 17:14

قضية المرأة اللي قالت حاملة من تسع سنين.. الجهل المغلف بالسحر والتوكال!!

قضية المرأة اللي قالت حاملة من تسع سنين.. الجهل المغلف بالسحر والتوكال!!

طارق باشلام

بحثت ليكم شوية فموضوع المرأة الحامل لتسع سنوات. المهم الإجماع ديال الأطباء المتخصصين في الولادة والأمراض النفسية ومن يصفون أنفسهم بالفقهاء والرقاة، وحتى الراقي المصري اللي عمّر اليوتوب وكيقول: “علاش ما يخلونيش أرقيها حتى أنا على اللايف”… هادو كاملين كل حسب نيته وميتافيزيقيته كيقولو الحمل وهمي، يعني حمل كاذب ومستحيل وأن الحمل الطبيعي تسعة أشهر يلا فاتها بشهر كيعاني الجنين ولا نقصات لسبعة او ثمانية أشهر كيتسمى من الخدج اللي بفضل الطب الحديث كيعيش معظمهم والحمد لله.
السيدة فالمنظور النفسي فكرة الحمل مترسخة عندها لدرجة التصديق المطلق، فهاد الحالة كيقول الطب النفسي أنها غادي يجيوها الأعراض نفسها لأي مرأة حامل، من ارتفاع فالسكري، انتفاخ فالبطن، انتفاخ فالأرجل، حالة وحم، ولكن كيبقى الحمل كاذب.
فمنظور الفقهاء وبعض الرقاة، وهذا طرح ميتافيزيقي ما عندو حتى دليل ملموس، هاد السيدة عندها سحر كيوصفوه، والعهدة عليهم، بالسحر المأكول، زعما شي وحدة حاقدة عليها بغاتها فيها ووكّلاتها شي حاجة بتدخل شيطاني فيما كيتقرا القرآن كتحرك ليها كرشها، وكيقولو هاد الفقهاء، فمجموعة من أشرطة الفيديو المرفوعة على اليوتوب، أنهم صادفو حالات بحال هادي.
الموضوع كبر وولّى عالمي، وهاد الرقاة ولاو كيتنافسو باش يرقيو هاد السيدة على الهواء مباشرة أو على الفايس بوك بتقنية اللايف، أو على اليوتوب باش يدخلو الصرف، لدرجة أن آخر رقية دّارت لهاد السيدة من طرف مجموعة من الرقاة المغاربة بالميكرو والهوبارلوغ والهيلالة بحال يلا جالسين فجنازة، ومرة مرة كينوض واحد فيهم يحط يدو على كرشها ويقرا بالميكرو بحال يلا كيهضر مع شي رجل وسط كرش هاد لمرا، وداك الشي ديال أخرج ولا غادي نحرقك.
الموضوع زاد طّور، واحد الراقي مصري تعصب حيت ما دّاها فيه حد، بغا يرقيها حتى هو ولو على اللايف، وقالهم علاش ما خليتونيش نرقيها حتى أنا، ويغوت ويطرطق حيت بغا حتى هو يشوفوه الناس فاليوتوب، وغير هاد البكا ديالو دار نسب مشاهدة حيت الموضوع عندو علاقة بالمرأة الحامل بحمل كاذب.
صراحة الجهل داير فينا ما بغى، والسيدة فالأخير قالت ليهم أي راقي ولا طبيب يجي يقولي هاد الشي حمل كاذب بلا ما يجي عندي، وكرشها ما كاينش شي موقع ما دوزهاش… فكروني فالبرلماني اللي عرّا كرشو ملي تقاليه كرشك فيها العجينة الله يعفو علينا منكم كاملين.